תבנית:לתלמיד מקור 1
כנת איהא אלתלמיד' אלעזיז ר' יוסף ש"צ ב"ר יהודה נ"ע, למא מת'לת ענדי וקצדת מן אקאצי אלבלאד ללקראה עלי עט'ם שאנך ענדי לשדה' חרצך עלי אלטלב, ולמא ראיתה פי אשעארך מן שדה' אלאשתיאק ללאמור אלנט'ריה, וכאן ד'לך מנד' וצלתני רסאילך ומקאמאתך מן אלאסכנדריה קבל אן אמתחן תצורך, וקלת לעל שוקה אקוי מן אדראכה, פלמא קראת עלי מא קד קראתה מן עלם אלהיאה ומא תקדם לך ממא לא בד מנה תוטיה להא מן אלתעאלים זדת בך גבטה לג'ודה' ד'הנך וסרעה' תצורך, וראית שוקך ללתעאלים עט'ימא, פתרכתך ללארתיאץ' פיהא לעלמי במאלך. פלמא קראת עלי מא קד קראתה מן צנאעה' אלמנטק תעלקת אמאלי בך וראיתך אהלא לתכשף לך אסראר אלכתב אלנבויה חתי תטלע מנהא עלי מא ינבגי אן יטלע עליה אלכאמלון, פאכ'ד'ת אן אלוח לך תלויחאת ואשיר לך באשאראת, פראיתך תטלב מני אלאזדיאד, וסמתני אן אבין לך אשיא מן אלאמור אלאלאהיה, ואן אכ'ברך בהד'ה מקאצד אלמתכלמין והל תלך אלטרק ברהאניה, ואן לם תכן פמן אי צנאעה הי.
