תבנית:לתלמיד מקור 2
וראיתך קד שדות שיא מן ד'לך עלי גירי, ואנת חאיר קד בדתך אלדהשה, ונפסך אלשריפה תטאלבך למצא דברי חפץ, פלם אזל אדפעך ען ד'לך ואמרך אן תאכ'ד' אלאשיא עלי תרתיב, קצדא' מני אן יצח לך אלחק בטרקה, לא אן יקע אליקין באלערץ', ולם אמתנע טאל אג'תמאעך בי אד'א מא ד'כר פסוק או נץ מן נצוץ אלחכמים פיה תנביה עלי מעני גריב מן תביין ד'לך לך. פלמא קדר אללה באלאפתראק ותוג'הת אלי חית' תוג'הת, את'ארת מני תלך אלאג'תמאעאת עזימה קד כאנת פתרת, וחרכתני גיבתך לוצ'ע הד'ה אלמקאלה אלתי וצ'עתהא לך ולאמת'אלך וקלילא מא הם, וג'עלתהא פצולא מנת'ורה, וכל מא אנכתב מנהא פהו יצלך אולא אולא חית' כנת ואנת סאלמא.
